對張智霖（Chilam）嚟講噚日可以話歷盡人生喜與悲，佢先喺將軍澳拍《生日快樂》嘅MV，之後要去婆婆曹黃南施嘅喪禮，Chilam自己都忍唔住話：「今日心情好跌宕，因拍完MV之後，要去殯儀館為95歲仙遊嘅外婆打點，夜晚再去朋友公司嘅春茗。」
下晝4點幾喺香港殯儀館見到Chilam同靚靚、上山詩鈉母女同埋舅父曹查理現身，為Chilam婆婆打點後事，Chilam話：「近年都好少同婆婆見面，係正常嘅生老病死，老人家最後因為肺炎喺上星期離世。」Chilam嘅好友邱淑貞、蔡一智同蘇施黃亦有到場。
大劉撐拐杖
另外，大劉劉鑾雄母親葉淑婉上周四病逝，噚日大劉同甘比、囡囡秀融如常去灣仔福臨門飲茶，其間見大劉要攞住拐杖行。跟住喺下晝2點幾，細劉劉鑾鴻同妹妹劉玉珍去咗香港殯儀館。直到4點15分左右，甘比就帶埋囡囡秀樺現身，兩個鐘後大劉一個人出現。
撰文：馮仁昭
