今期(22日)夜馬第七場三班一哩，徐廐「大把世界」馬主全勝團體由一班猛人組成，包括港交所主席周松崗、馬會前主席陳祖澤、怡和大班凱瑟克家族後人Benjamin、商業電台老闆何驥等。而選過特首嘅李福善，生前亦係此團體成員。大家睇見佢哋嘅名字，只會聯想起政商界，但其實此團體同娛樂圈女星，都有啲淵緣。
原來全勝團體另一成員，正係人稱十哥嘅地產商Timothy林棣權，十哥同人氣女神吳若希係好朋友，兩個識咗成九年，早排吳若希阿媽妙單車昏迷入院，十哥都有安慰吳若希，問佢有冇需要幫手，而之前袁詠儀與張智霖結婚13周年飯局，十哥亦有出席。
十哥除咗搞地產等生意，亦係香港保護兒童會管理及財務委員會主席，為個會做過好多嘢。雖然佢非常繁忙，但「大把世界」今季初贏馬，十哥都有抽空到場拉頭馬。
講番隻馬，在港四捷，有兩次贏谷草1650米，路程有根據，上場用十磅仔黃皓楠發揮麻麻發力太早都輸唔遠，反映已回勇，唔知「大把世界」係咪貪新鮮，過去潘頓、韋達、郭能、雷神或梁家俊初騎都非冠即亞，仲要次次好分，今由何澤堯首度接手，睇嚟十哥又可以現身凱旋門。