劉青雲在金像獎再度稱帝；其成名作《大時代》碰巧又重播，令我想起兩個字：「時機」。我聽編劇朋友說，《大時代》編審曾謹昌曾說過：「世上無追不到的女仔！一切只在乎時機。」你可能大笑：「痴線！近至同office個靚女；遠至明星、有錢女，高山低谷，點追？」
編劇係愛發夢，但細想便知這並非夢話！明星都有識於微時；靚女、有錢女都有失意軟弱時，只要時機對，世事無絕對！（註：追到唔包長久！）其實重點在第二句。「時機」不只在情場，在很多範疇上也是成敗關鍵。如影壇的劉青雲，演技毋庸置疑；但1994年首次提名影帝，遇着《八仙飯店》的黃秋生，冇計！一直等了13年才首度當選，16次提名也只贏了兩次呢！
體壇也一樣。金像獎中，若同年有王家衛或許鞍華的戲，別的戲想得獎便難過登天！就像生於「佐敦時代」的馬龍和史托頓，點勁都只可做無冕球王；相反，2004年歐國盃各強隊齊齊失準，造就希臘奪冠神話；看其之後幾屆大賽表現，便明白其神話絕對是「時機」締造，再難複製。當然，亦有時機出現卻未能好好把握的，像謝拉特；去季曼聯換班、車仔磨合，紅軍又擁大勇阿蘇，本是首奪英超良機，可惜……到今季，看他英足盃尾段靚絕飛頂死角也被護空門，令人慨嘆，「時機」，已不再屬於他了。
方栢翹
now足球評述員