NBA常規賽一哥勇士，周一喺西岸季後賽首圈Game 2主場出擊面對塘鵝，靠球隊「二佬」K湯遜（Klay Thompson）獨取26分，以97:87再挫對手；同日另一場東岸首圈，公牛又係靠「二佬」占美畢拿（Jimmy Butler）發威攻入31分下，以91:82擊敗公鹿，兩隊同樣領先2:0。
塘鵝教練莫迪威廉士（Monty Williams）賽前指勇士主場球迷太熱情太嘈，令佢冇法子畀指示，結果就俾勇士球迷送上耳塞暗諷佢。勇士呢場精心部署守死塘鵝大前鋒安東尼戴維斯（Anthony Davis），加上繼續施展「三分雨」，K湯遜比「大佬」史堤芬居里（Stephen Curry）打得更搶眼，獨取26分，幫勇士領先2:0。教練卡爾就話：「球隊一直保持興奮狀態，今仗球員又做出一啲瘋狂事。」
鷹隊主帥膺最佳教練
不過，卡爾就失落咗今季NBA最佳教練獎，輸畀鷹隊嘅保丹荷沙（Mike Budenholzer）；保丹荷沙以累積513分，擊敗獲471分嘅卡爾。保丹荷沙今季帶領鷹隊攞到60勝22負嘅佳績稱霸東岸，佢亦係鷹隊自1994年嘅韋健士（Lenny Wilkens）後另一位最佳教練。
至於公牛「大佬」戴歷路斯（Derrick Rose）周一手感麻麻，14投得4中，好彩「二佬」占美畢拿創下個人季後賽新高31分，領軍贏91:82，同樣建立2:0優勢。