鄉議局主席劉皇發由1980年起一直穩坐新界人龍頭位置，歷史比《基本法》、《中英聯合聲明》更悠久。嚟緊6月1日鄉議局就改選，究竟發叔仲做唔做？新界班鄉頭好撐佢，但發叔就話要諗諗先喎。
發叔噚日開鄉議局執委會時提醒大家，6月1日改選正副主席，希望有志人士及早作出準備。跟住元朗廈村鄉鄉事委員會主席鄧勵東就即場整個臨時動議，力撐發叔冧莊，原因係香港正值多事之秋，好似政改、港獨意識興起等，需要有位經得考驗、識大體、明大義嘅領導人，發叔就係不二人選喎。發叔聽見相當受落，但就話仲要啲時間考慮，一來乾隆做到80歲都退休喇，二來年近80歲嘅佢同八方講，健康係另一考慮，總之下個月先算。其實發叔前排抱恙要入院休息幾日，真係要保重身體呀。