政務司司長林鄭月娥今日公佈政改方案後，星期六就會帶成班問責官員落區晒馬宣傳袋住先。就喺呢個政改關鍵時刻，特區第一號人物梁振英卻會喺林鄭落區作戰嘅「超級星期六」出發去吉隆坡訪問，下周一至返；點解梁特要迴避？惹起政界議論紛紛。
去吉隆坡出席論壇
好多人想知，梁振英今次去吉隆坡做乜？點解要喺關鍵時刻缺陣？政府話CY要出席亞洲策略與領導研究所主辦嘅第12屆東南亞國家聯盟（東盟）領袖論壇，到時仲會發表演說並出席晚宴。而喺吉隆坡期間，佢仲會同東盟成員國領袖、當地商界代表以及喺當地工作同生活嘅港人會面。商務及經濟發展局局長蘇錦樑會同CY同行，換言之同樣唔使上陣。而CY離港期間，林鄭會署理特首職務。
根據八方非正式兼唔科學嘅統計，CY幾乎搞親邊瓣、嗰瓣就一定唔得，如果係咁，就同政改口號「一定要得」有啲相沖嘞。而佢過往每次落區，都會成為眾矢之的，衝擊不絕，為免為警方添煩添亂，佢唔現身亦有好處。八方相信就算有人狙擊林鄭，都唔會有CY嗰種大陣仗。
有官場中人就同八方講，今次由林鄭而非CY擔大旗sell政改，所以同上次政改由煲呔領軍起錨好唔同、規格亦低咗；但講番轉頭，若然由CY領軍作戰，對爭取民意有幾大「幫助」，大家心知肚明；既然係咁，CY此時此刻避吓唔現身，未嘗唔係好事喎。
mailto:[email protected]
李八方