曾自詡係白宮發言人嘅新聞統籌專員（IC）馮煒光，噚日到樹仁大學以「新聞統籌專員的角色」為題演講，但記者入唔到場旁聽，惟有事後追問佢係咪曾化名「金鐘仁」喺報章撰文，但佢繼續拒絕評論，只話「留番啲想像空間畀大家啦」。
八方聽聞，IC席間避唔到學生尖銳提問，第一條問題就問佢係咪金鐘仁，據知IC會上答：「所有人問我都係咁答，我唔回應。」有學生則質疑佢曾轉載港視劇照抹黑佔領人士係失職，佢就回應：「人總會中伏嘅，一個唔犯錯嘅人，唔係一個好真嘅人。」
自覺成功稱職
問到梁特現時形象插水，有冇覺得自己不稱職？IC就話「覺得自己係成功嘅」，指試過陪梁振英去街市買生果同骨頭畀梁振英隻狗食，唔少人都同梁特合照，令佢覺得民情同輿情係有分別。至於梁振英點樣改善形象，佢話一直都有鼓勵梁振英笑多啲。
問到馮煒光喺返工時間同記者喺facebook筆戰，佢堅稱，「我放咗工囉喎，5點09分至upload㗎喎」，但特首辦回應本報查詢時就話，2006年實施五天工作制後，特首辦辦公時間為8點45分至下晝6點，咁IC咪即係返工時間同人網上開拖？