民主黨預計年底派近百人出戰區議會，而該黨新東支部原來喺上周五開會，決定推薦出戰名單。近來因袋住先言論辣㷫唔少兄弟嘅新東前立法會議員黃成智，據聞喺開會前10日左右表態話參選，想出戰新選區粉嶺南，但當日就俾黨友大比數否決推薦佢披甲。
雖然有報道形容黃成智今次係被黨友清算，講到個會好似為黃成智而設咁，但花生友聽聞呢個會議一早安排咗，亦通知大家盡量要出席，主要係畀機會黨友質詢，有新東白鴿話喎：「咁要互相尊重，唔係話知名度高，就老馮要畀你過。」據了解，唔出席會議就唔獲推薦嘅唔只黃成智一人，仲有早前撰文轟黃袋住先嘅現任沙田區議員麥潤培，據知佢同樣不獲支部「祝福」，但佢兩位仲可以直接向中委上訴嘅。
黃成智話晒都係新東大佬級人馬，花生友聽聞今次支部投票係大比數否決推薦佢出選，主要有兩大原因：到臨開大會前先報名，只簡單交代話想喺區選中幫吓北區兄弟，畀人感覺係大佬文化兼老馮；其次當然係政改袋住先言論令新東黨友好不滿，「有意見唔緊要，但講之前係咪要諗諗對其他兄弟有冇影響，佢係中委，又係前立法會議員，講嘢點都有份量」。簡單而言，如果佢哋撐黃參選區議會，分分鐘影響選情。
花生友