【質問高層】
滙控股價近年積弱，昨日舉行的股東會上，散戶除怒斥台上四名包括行政總裁歐智華在內的管理層失職、要求「台上全部人都要辭職」外，亦遷怒於早前未能抽中150周年紀念鈔，質問獅子行「點解唔畀股東優先抽呢」？
轟股價跌 股息低
出席滙控股東會的散戶，初時以較理性思維提問，範圍包括近年屢屢被罰款如何解決？英國分隔投資銀行及零售銀行（ring-fencing）規例總成本多少等，但其後有股東坦言「想問現實少少嘅問題」，「點解長情股東無得優先抽（紀念鈔）？程序點解咁唔公平？點解唔印多啲？」
滙豐銀行亞太區副主席兼行政總裁王冬勝解釋，未能每人都抽到一手，是因為參與人數眾多，而且長情股東好難界定。抽籤程序則有會計師行在場，已確保最公平公開。
惟對答「辣着」其他不滿股東，在台下大喊批評滙控「股價跌，股息低，𠵱家連紀念鈔都抽唔到！」更指滙控發可轉換債券（Coco Bond）高達6厘息唔益小股東，只係益機構投資者。
有於高位115元買入、持有大量滙控股票的股東蘇先生，在會上大罵管理層，批評銀行合規力度不足，瑞郎脫鈎當日系統失靈，令銀行蝕錢，「台上全部人都要辭職！同埋要好似韋達誠（港鐵前行政總裁）咁唔收花紅。」又指滙控在亞洲賺大錢，但「喺歐美就畀人罰款撳晒出嚟」，重申滙豐管理層「要檢討，要離職」。
滙控主席范智廉則回答指，在集團及董事會工作近20年，將會持續進行重整及管理好業務。
記者：周家誠
【股東心聲】
贊成遷冊香港
陳先生指揸咗滙控3萬股十幾年，平均用80元買入，贊成滙豐遷冊返香港，唔使喺歐美元地區成日畀人罰錢畀人撳，派息都多啲。
賣舖買股勁蝕
蘇先生表示，好多年前賣咗間舖買滙控，平均價用咗115元，管理層花言巧語成日話穩陣，點知股價蝕到暈，仲要學人出花紅！
