停賽三期後，馬場萬人迷莫雷拉周三(22日)終於復出，共策七駒，實力馬包括「勝利雄心」、「心好事成」等，都係上場有好表現嘅馬，但唔好因此睇低韋達，因為佢係今期唯一跑足八場嘅騎師。
韋達最近手風大順，四月份跑咗五次賽事，四次起孖加一次大四喜，今個月已經贏咗12場頭馬，今次佢嘅座騎質量，可以話冠絕所有騎師。「心花怒放」、「香江福星」都新勝猶勇，其中「心花怒放」上仗排12檔劣勢下跑泥地都贏，可見有進步，今仗轉爭谷草1200米，此程四戰三上名同樣有根據之餘，更排正個靚靚二檔，加上升班負磅大減，連捷機會可謂非常突出。
其他韋達座騎方面，「金獅叻將」一連兩場喺1200、1400米追唔切得個近字，反映態勇而路程嫌短，今次增程初跑一哩啱晒，隻馬今朝(20日)晨課亦有動靜，韋達操完廐主霍利時早喺機坪附近等候，急急腳跟住隻馬返倉，以作仔細檢查，非常緊張，今次莫雷拉復出，估計韋達喺騎師王彩池唔會太熱，反而係捧場良機。
韋達今期座騎
一場 樂趣
二場 賞面
三場 富貴榮華
四場 名馬
五場 安打
六場 心花怒放
七場 金獅叻將
八場 香江福星