一帶一路炒咗咁耐，終於要見真章！國家主席習近平由噚日起，一連兩日訪問巴基斯坦，巴基斯坦就派戰鬥機為習主席護航。兩國咁重視，一批所謂中巴互通概念股即時落鑊！北新路橋、中國中鐵等股均於噚日跌市中升停。
巴基斯坦被內地網民稱為「巴鐵」，意思是「鐵哥們」，係中國外交關係最好國家，關係仲好過北韓。中國與周邊接壤國家幾乎全部有領土爭議，唯有巴基斯坦例外。雙方又有共同仇敵印度，更加係親上加親。
兩國關係咁好，難怪中國外交部長王毅話，雙方打造的中巴經濟走廊，是一帶一路的旗艦項目，據聞雙方將簽460億美元基建合約。以今時今日中國外交環境，要令一帶一路有實效，巴基斯坦幾乎係唯一可以交到功課的國家，難怪可以帶起炒風。
黃尹華