新民黨主席葉劉淑儀上星期喺facebook一句「菲傭淪外籍男士性資源」，俾唔少網民插爆；亞洲外傭協調組織就促請平機會徹查，仲要求菲律賓政府列佢入「不受歡迎人士」拒絕入境。葉劉早前表明唔會道歉，話自己只係提出一個關注問題，「關注都要道歉？」
菲律賓駐港總領事館噚日終於出聲，話佢哋都好關注葉劉如此「不幸」嘅遣詞用字（unfortunate choice of words），但相信呢番言論並唔係反映緊香港社會嘅主流民意。睇嚟葉劉如果真係要參選特首，就確實要好好咁再「準備吓」。
聲明話，香港有超過17萬名菲傭打工，離鄉別井同至愛分開，嚟到香港打工照顧香港家庭，間接為香港經濟出一分力㗎。
菲律賓駐港總領事館聲明仲寫到明任何社會都容納唔到歧視，尤其係自詡亞洲國際都會嘅香港。葉劉點接招先？葉劉助手話，葉劉冇補充喇。