星期日入馬場，見到運輸署前助理署長Albert蘇祐安，遞來新名片，原來佢剛剛轉職東華三院，接替吳志榮，出任執行總監一職。
如果你一時唔記得佢係邊個，只要Mary提吓你，佢就係佔中期間，許sir 四點鐘講完嘢後，那個跨部門記者會中，向媒體滙報佔中對交通影響嗰位斯文兼囗齒伶俐嘅官員，你就一定記得，由於同場幾位都係多數都係官場手袋黨，好多時幾娘教子，由佢一夫當關，特別搶鏡。
其實，做開運輸beat嘅行家對佢不會陌生，佢在運輸署多年，由總運輸主任、首席主任到助理署長都係署方最佳發言人。
其實除了Albert，政府中人跳槽NGO早有前科，商務及經濟發展局前首席助理秘書長陳欽勉也在年前轉戰保良局，出任行政總監，這日同樣也出席了馬會為答謝NGO夥伴而舉辦的社群盃。另外，商界對前官員一樣虎視眈眈，數周前港鐵也委任了曾任職政府多年的Linda蘇家碧做公司事務總監，主力要增進同持份者溝通咁話。
中高層官員被高薪挖角，固可解讀為以當今政治氛圍，政府真的唔易做，因此能力高強的醒目仔女紛紛另謀高就。但也不妨看成機構對有公共行政經驗的中高層官員，需求甚殷。
像Albert 、Linda這類在政府任職超過廿年的小中年，今年不到50歲，正是當打之年，人脈廣闊，熟悉政府運作，正好出任外間機構以廣結善緣為主的高層職位。
事實上，近年為數不少年輕政務官做不了幾年就轉投公關或對外事務工作，無辦法，今之機構，除搞好核心業務，還得處理眾多持份者訴求，於是甚麼地區關係、政府關係部門紛紛成立，AO自然搶手。
彭瑪莉
mailto:[email protected]