早排政務司司長林鄭月娥會見各個政黨，逐一向佢哋宣佈8.31人大常委會決定冇得改，叫佢哋死心唔好再心存幻想，而當日林鄭見公民黨時，只有梁家傑同郭榮鏗出席。Ronny噚日出席劉慧卿網台節目時話，其實佢都想去呢場會面㗎，但係黨嘅領導層因為一個數字嘅問題，唔畀佢去，令卿姐都忍唔住笑咗出嚟。
湯家驊話，公民黨嘅領導話，該黨出席呢場會面嘅人數，唔應該多於民主黨會見林鄭嘅人數，由於民主黨只有卿姐同何俊仁出席，即係公民黨最多只有兩個人可以赴會。由於梁家傑同埋郭榮鏗已率先報名，所以最終Ronny想去都冇得去。湯狀話呀，唔同意黨嘅決定，認為唔應該用人數去衡量呢場會面嘅重要性，不過個黨既然決定咗，佢都唔想爭拗咯喎。