足總盃仲係咁好睇咁緊湊，足總盃仲係爆得杰過英超。
又話英超水平越嚟越高，好難越級挑戰，但點解老掉牙嘅足總盃今時今日仲係爆冷溫床。剛過去周末，唔單只兩場英足盃準決賽計90分鐘賽果都爆冷；連埋上一圈八強，六場波只有維拉之前主場淘汰西布朗係正路賽果，其餘單計90分鐘都出冷，決賽5月30日先打，廠迷望穿秋水；計比賽部署，其實阿仙奴寧願鬥肯攻嘅利記，都有把握過迎戰突擊厲害、季尾翻生嘅阿士東維拉求冧莊。𠵱家兩個「A」字頭球隊爭食尾糊，賠率、同球迷支持度懸殊，實際戰情未必。
相反，剛過去一輪英超，見到為求成績，懶理批評嘅摩佬，為車仔泊「大巴陣」小勝曼聯後，手執盃耳，英超前列只剩名次之爭，悶咯！總計今輪英超七場波只開出水晶宮主場負西布朗最意外，其餘熱W順到開巷；周日英足盃「阿利戰」開波前上演曼城鬥一早上咗岸嘅韋斯咸，戰情淡如開水。只求贏波保前四嘅藍月亮，一早贏夠兩粒收工，令大家可安心轉台睇英足盃；只見牛記笠記嘅藍月隊長高柏尼，因養傷企喺場邊攞住杯飲品悠然觀戰，證曼城今季失敗之作。
老將、工兵，拼足大半季後跌watt可以理解，所以新官、後生仔，喺季尾特別搶眼；利記有謝四（圖）停賽復出，少帥羅渣士一早想鏟走舊臣，也不敢造次再放忠臣於後備席，結果利記成場波陣式變來變去，可惜踢足全場嘅謝四末段頭槌攻門被救，巴神被枉判越位。口講漂亮，紅軍當然想為「謝四捧盃餞行」；但實情都係睇住史達寧張約點收科，利記同藍月一樣，來季陣容會執得好狠。
車仔幾定封王，護級卻極緊湊，但對大部份球迷都係剝花生，感覺唔會強，英超餘下一個月比賽，賣點唔多。維拉周日喺被一致看淡下爆6.1倍贏波，全場不落下風，充滿激情同朝氣，正係英國波幾十年嚟嘅賣點，戰意壓倒一切，一場波決勝嘅比賽變數特多，呢個溫床唔易改變。喜用新人嘅領隊舒活呢鋪省靚招牌，19歲新星基亞利殊，周日被換出時接受舒活親吻鼓勵，波友喺英國波又幾時見過呢類場面？
周中焦點又落在冇英超隊嘅歐聯，上周睇過辦，投注有番啲靈感，當中對明晚嘅皇馬上盤，最有信心，雖然冇咗兩主力加里夫巴利同莫迪歷，但轉踢4-4-2反而令熟路嘅馬體會難適應。馬體會上周靠神龍奧比歷全場八次撲救，力保球會近八次歐聯七度不失球兼近七戰鬥皇馬不敗嘅輝煌戰績；不過班波今季明顯冇咁銳。皇馬爭聯賽把握不及一哥巴塞，冧莊歐聯決心巨大，返主場半/一高水可捧。
波神
電郵：mailto:[email protected]