人行大戰丁蟹首日，戰果爆冷。原本早段雙方拉鋸，人行仲贏緊個馬鼻，點知下午走勢已逆轉，丁蟹威力不容忽視。到底甚麼消息令內地股市午後急轉彎呢？朋友笑說，你搵到具體原因嘅話，我當你係葉天（方展博的師傅）咁拜！又係，睇住隻南北車A股，升完又喪跌、跌完又再升的走勢，你就會明白，個市已經癲咗。
有分析師朋友說，昨日大市無厘頭轉勢，連人行落重藥都無力回天，反映短期來講好消息已盡出，要買嘅人已經買晒，是時候調整。瑞銀昨日發表報告，話原來恒指的預測市盈率，已去到3年平均standard deviation（標準差）的3.8倍。即係點？意思係呢個超買水平，在恒指過去10年以來（包括2007年的大牛市），只出現過26日。呢個只係機會率的問題，大市短期要繼續勁升？可能要九星連珠、即有丁蟹咁好運，先搞得掂。
當然，資金市下不宜太淡，調整是為了迎接下一個升勢做準備。但下一轉，是否仍會重現雞犬皆升的情況？隨着內地機構投資者開始進入市場，他們雖認為港股便宜，但炒「自己錢」和炒「人哋錢」始終有別，他們未必會如零售大戶般非理性。港股亦始終和A股有些不同，就是海外基金仍可因應市況，對一些估值極端離譜的股票「採取行動」。投資者雖對大市中期續升的看法未改，但趁機轉吓身，未嘗不是一件好事。
海迪