港股再次進入「大時代」，丁蟹效應一出，仲勁過阿爺出招，恒指噚日收報27094點，跌咗558點，但金融服務界立法會議員張華峰卻好有信心，一向情傾港交所嘅佢，早前升市已大有斬獲，頻頻被人「邀請」請食飯賀一賀。
佢噚日同傳媒食食吓午飯，又再講港交所有幾值得買，話噚日開市288蚊，如果回落到270蚊就掃貨，點知餐飯未完就到價位，佢即場打畀經紀（圖），分兩次掃咗10萬股港交所，入手時係268.8蚊，噚日收市就升至272.8，喺大跌市下，一來一回賬面賺近40萬。賺到咁開心，畀人揼心口就預咗，30日就請建制議員冇上限擦一餐。