上季雷神來港發展之後，馬圈形勢大變，唔單止韋達嘅地位下降，由於雷神搶去大量輕磅實力馬，令好多華將陷捱打狀態，成績大跌，馬壇神童蔡明紹就係人辦。不過都有例外嘅，好似靚仔騎師梁家俊，就係少數成績不跌反升嘅華將。上季佢跑足一季，只得18 Win，但今季四月未過，已有21場頭馬，日前佢去澳門客串，女友阿Kit李潔瑩陪伴左右，家俊仔喺愛情魔力下發揮神勇，策「妙算威驥」贏表列賽外，喺澳港盃亦憑「好精神」殺入亞軍，可見佢手風順，狀態非常之Fit。
愛情事業兩得意嘅家俊仔，今期（22日）夜馬又有唔少實力座騎，當中最穩健應係「萬眾期待」，近四場攞三冠一亞大熟大勇，繼續跑首本嘅谷草一哩，排埋個黃金一檔，除非好黑，否則坐二望一真係唔難。
仲有沉香大王簡文樂愛駒「伽楠」，亦係連場接近嘅當打年輕馬，家俊仔騎過佢6次得2冠1亞，入Q率有一半，今場對手好水吓，當然要把握機會盡量數糊，希望盡快贏夠老婆本！