利豐（494）舊年業績麻麻，盈利按年倒退18%，但公司表現並冇體現喺管理層人工身上。利豐三大高層舊年人工全線勁升，當中以7月時已因應分拆計劃而辭去利豐行政總裁（CEO）嘅樂裕民加幅最厲害，總薪酬按年勁增90%，袋4,582萬元，呢個數大部份以酌情獎金為主。
至於利豐「太子爺」、新上任嘅CEO馮裕鈞（Spencer），整體人工就較前年勁升68%，袋1,363萬元，Spencer剛上任CEO冇幾耐，仲未向市場顯示佢嘅實力，如果華華係利豐股東嘅話，就希望佢今年業績真係交到數，先好收番多啲獎金喇。利豐主席馮國綸舊年整體薪酬就升25%，袋2,472萬元，其中底薪略略加咗1,000蚊美金，大部份加幅來自酌情獎金。