呢輪香港啲新聞不外乎股市、政改、膠袋稅等，都係相當貼身嘅問題。不過花生友聽聞，開口埋口都講國家安全嘅阿爺，原來唔係得把口，係堅關注問題，尤其見到有報道話喎，回教遜尼派極端組織伊斯蘭國（IS），疑似喺香港收兵、仲有報道話有印傭搞神秘聚會，難怪有立法會議員即刻跟進。
雖然嚟緊星期三嘅立法會大會要辯論預算案，同埋畀港府公佈有關袋唔袋住先嘅政改方案，但議員一樣可以提出書面質詢。民建聯陳克勤最近入咗條問題，關注到國際恐怖主義勢力近年不斷擴張嘅情況，要求港府交代吓，點樣阻止境外恐怖主義活動、有冇相關法例等問題。
陳克勤喺民建聯主要負責環境、發展兩大範疇，保安嘅嘢都係由葉國謙孭飛，點解呢次由佢出手？佢同花生友講，其實上面啲人都擔心，香港作為一個出入境咁自由嘅地方，容乜易有恐怖主義組織喺香港搞事？相比起嚟，藏獨、疆獨都比較政治性，但好似IS一類，就唔同講法，真係會有所行動，所以都值得問吓特區政府做咗啲乜。
照咁睇嚟，似乎嗰啲南下嘅收風人，都幾唔得閒，因為除咗要留意政改、港獨之外，連IS都要關注埋。花生友強烈向佢哋推薦，得閒搵有民主黨FBI之稱嘅涂謹申交流，尤其佢係保安事務專家，話唔定會有收穫喎。
花生友