耀才證券（1428）嘅大隻佬股評人郭思治（郭Sir）果然多粉絲，佢上周六代表公司北上深圳向內地股民講股一粒鐘，吸引到300人到場，迫滿成個講股場地。可能股市實在太㷫恰恰，郭Sir講到一半竟然熱到要除衫，伺機露一露手臂肌肉，現場粉絲見到竟然尖叫起哄，認真誇張！
60歲嘅郭Sir日練夜練一身肌肉，原來真係有回報，吸引到一班粉絲，佢都話，自己「男女粉絲都多，可能大家鍾意我大隻」。不過，講到尾，股民最想知道郭Sir對股市有乜真知灼見，郭Sir指，內地股民跟香港股民有些少分別，佢哋較少問冧巴，多數問成個投資趨勢，雖然港股早兩個星期升到澎澎聲，但係佢見內地股民多數有保留，擔心升得太急喎。