歐聯八強次回合前夕，有份出戰嘅西甲三雄巴塞隆拿、皇家馬德里同馬德里體育會，上周六都喺聯賽贏波，不過皇馬拎呢三分就有血有淚嘞，事關皇馬雖以3:1擊退馬拉加，但翼鋒加里夫巴利同中場莫迪歷都先後受傷，莫迪歷更因膝傷料提早收「咧」㖭，銀河艦隊求神拜佛，希望今季已轟入50球嘅基斯坦奴朗拿度（C朗）續勇，先有希望主場攻破馬體會大門。
莫迪歷膝傷或收「咧」
皇馬又想衞冕歐聯，又想喺聯賽追趕巴塞，教練安察洛堤（肥安）上周六都冇得留力，只有膝傷嘅賓施馬因傷缺陣，不過慘事接二連三，巴利只踢咗五分鐘就拉傷小腿肌肉退下火線，據報要休戰三星期；三月初先復出嘅克羅地亞中場莫迪歷仲慘，下半場又整傷膝部，更加可能提早收「咧」。
肥安慶幸嘅地方係球隊仲有好強嘅攻力，三個入球中最靚都係占士洛迪古斯嗰球嘞，佢同隊友做兩次撞牆式入楔，然後禁區頂勁射死角入網；C朗原本都幾乎做咗罪人，事關佢67分鐘射失12碼，未能擴大領先，好彩補時階段接應「小豆」查維亞靴南迪斯傳中近門射入，幫皇馬埋齋射成3:1，佢亦喺今季各項比賽累積50球，近五季都超過呢個數，簡直就係創舉。皇馬贏波後仍然以兩分落後畀巴塞。
歐聯八強首回合皇馬同馬體會踢成0:0，次回合雖然有主場之利，肥安都唔敢輕率，佢就話：「我對球隊晉級仍然樂觀，不過傷停問題真係好大困擾，好彩係法比奧干查奧已經復操，佢應該可以正選踢左閘，賓施馬康復情況都理想，應該可以及時復出。」
基沙文大勇 皇馬睇路
馬體會同日就由基沙文包辦兩個入球，作客以2:1小勝拉科魯尼亞， 保持西甲第三位；馬體會教練施蒙尼出名錫麾下球員，上半場基沙文俾主隊後衞薛尼列曹侵犯，雖然球證已經吹罰，兼判薛尼列曹黃牌，施蒙尼仍然猛烈投訴，結果俾球證趕出場，咁啱得咁蹺，施蒙尼喺西超盃被趕出場，都係同樣嚟自呢位叫波巴倫嘅球證。施蒙尼咁好火，周三作客皇馬應該有好戲睇。
識睇，一定係睇足英台【英波Live】：
http://soccer.appledaily.com
http://bit.ly/engballlive