現役有三位見習生，其中呂卓賢停緊賽，變成今日只得吳嘉晉同黃皓楠可跑。結果第三場四班千二米，就係由佢兩個串成44倍Q。
吳嘉晉今場騎東廐22倍馬「奀皮仔」，雖然此駒慣性內閃頭側側，仍後上衝贏黃皓楠座騎「雷神」，五歲拍賣馬累積五win，近三場兩度爆冷建功，當中近兩季各贏兩場，對馬主嚟講呢個奀皮仔都算乖仔。
睇番今場出馬12隻，實際僅得「奀皮仔」同「雷神」贏過馬，兩駒分別排最外的12檔及最內之1檔，賠率一冷一熱。姚廐「雷神」後備補出用黃皓楠減十磅落足飛，成3.5倍大熱門，o靚仔楠沿途走位其實甚佳，直路從兩駒中間竄上亦見膽識，拉士一度走甩，可能o靚仔楠以為贏梗，點知「奀皮仔」殺上，o靚仔楠有點手忙腳亂，窒了一窒，其實他如齋推便應可頂住「奀皮仔」，但o靚仔楠又鞭又推，單手推騎反而逼不出「雷神」的爆炸力，結果頸位不敵「奀皮仔」屈居亞軍。
告東尼贏「奀皮仔」，補番「萬事勇」過大海跑澳港盃大熱倒灶條數，而今場三、四名分別係半冷門「大地和平」同冷門「馬主明星」，四重彩派十萬三千幾。