特區嚟緊有兩場選舉，各式選舉機器都要出動幫手拉票。如果好似花生友一樣咁心水清，一定會留意到，近一年都有唔少愛國愛港社團成立咗，而且，佢哋嘅規模亦發展得好快，例如可以喺短短幾個月間，就喺5區開辦事處，到底目的何在？大家唔會純情到覺得，只係旨在聯繫鄉紳圍威喂咁簡單啩？
有建制派中某日同花生友吹開水，講到年底嘅區議會選舉，佢坦言剩返幾個月，時日無多嘞，好多人做緊嘢。「『好多人做緊嘢』？有乜咁多人咁巴閉？」「總之唔係外星人、又唔係筋肉人。」
查實花生友都覺得呢個回應，好爛囉，但無因此放棄窮追猛打，結果得出「鄉里永遠最多人」。哦，明晒。原來係講緊同鄉會。然後上網細心翻查吓，咦，由全國政協常委陳永棋擔任主席嘅香港廣東社團總會，原來喺舊年下半年開始，籌備今年五大立法會直選區域都要有辦事處，結果啱啱喺上個月，真係達標嘞，5區都有落腳位，據聞佢哋要5區遍地開花，係要「密切聯繫群眾，深入社區工作」，識得聽，一定聽得出事有玄機啩？
至日前又有個叫做香港東北人聯誼會嘅組織誕生嘞，據聞獲西環、港區省級政協委員聯誼會、工聯會等人力撐成立，斷估大家唔會以為佢哋勞師動眾，只為聯誼啩？咁全國政協常委唐英年牽頭成立嘅香港江蘇社團總會，唔通又係為咗選舉而設？花生友唔敢講呀，但就聽聞、聽聞㗎咋，西邊嘅人覺得，在港江蘇鄉里係有錢佬，卻冇乜隊形發揮實力，係時候搵人領軍團結一致。至於選舉時出錢定出票？睇怕都要唐唐本人先話到畀大家知咯。
花生友