蘇志威早排俾自己養嘅獒犬咬傷左手，噚日佢同韓馬利、楊洛婷一齊喺美孚出席「大型綜合教育概念中心開幕禮」，隻左手仲包住紗布，而且都幾腫吓，不過蘇老闆反而好開心，猛話自己因禍得福。本來佢隻手已經好咗好多，但因為前日要做演唱會，平時做嘅側手翻同蜈蚣彈，已經全部唔敢再做，只係跳吓舞都已經搞到隻手滲血兼腫番，蘇老闆喊晒口話𠵱家每日要做扭手腕物理治療嘅動作，但次次做都痛到喊。
不過之後佢又笑住話因禍得福：「老婆幾耐冇幫我沖涼呀！呢個星期，我日日包住對手等佢幫我沖，成個大爺咁。」
楊洛婷呻難生B
另外，03年港姐鄧源慧係呢間中心嘅校長，所以楊洛婷特登嚟支持同屆姊妹，仲話要報定名，等到造人成功就安排小朋友嚟上堂，不過佢就猛呻老公黃天翱（Tim）唔配合：「都冇時間拍拖造人，近排都淨係睇過一次戲，佢要錄歌拍MV，又要去美國、英國做嘢，成日見唔到，希望7月可以一齊去挪威旅行啦。」
撰文：馮仁昭
