財經事務及庫務局局長陳家強「重出江湖」，再次寫blog！大家應該未必記得，陳家強其實有個「局長網誌」，佢由2007年寫到2011年，後來佢見財爺曾俊華每個星期日都有一篇「我的網誌」，慢慢就開始停寫，好似冇咗呢件事咁嘞。最近佢忽然心癢癢，噚日開始再寫番blog，初步冇話一定每星期一篇，主要視乎有冇事情想跟大眾分享。
陳家強以前教書，寫blog都係比較學苑派，指早前去上海出席滬港合作第5次工作會議，相對2010年首次開會，人民幣國際化已經有好大進展，𠵱家仲有滬港通。佢當年形容香港與上海就好似兩個飛機引擎，可以一齊發動，時至今日，佢認為，隨住內地市場不斷開放，上海呢引擎自然變得越來越大，香港因此要去搵新亮點。
至於有乜潛在新亮點呢？局長就冇講，可能留番下次寫啩。