四月十三日本欄寫一句美國俚語：if it ain't broken, don't fix it，一位有心人讀者來電郵話，依照文法，應該係if it is not broken, do not fix it，讀者當然是對的，要在此講一句多謝。美國俚語講慣咗，未必依足文法，例如I ain't got no money，如果對美國黑人講成I do not have money就太過文縐縐咯。
環境局發表一份「電力市場未來發展公眾諮詢」文件，有80頁咁長，綜合上次諮詢意見，寫得幾公道，可以一讚。環境局見記者之時，演述一份精要本，係18頁紙嘅 PowerPoint，一位相熟記者搵到一份俾左丁山瞄一瞄，瞄完就加強咗一個印象，又係if it ain't broken, don't fix it！環境局都幾讚賞香港兩間電力公司嘅喎，試列舉環境局簡報要點如下：
（一）供電可靠性，以2011-2013平均數值計，新加坡第一，港燈第二99.999%、中電第三99.9996%，倫敦低於99.994%，所以話香港供電安全紀錄高，甚少大型意外，全年平均意外停電時間少於三分鐘。
（二）合理價格：港燈每度電係港元1.00，中電係1.11，新加坡係1.5以上，倫敦電價接近2.0，紐約低於2.5，香港家庭亦慳電，電費佔家庭開支2%而已。
（三）排放（2012年與1997年比較）SO2降72%，NOx降43%，RSP降63%。
（四）海外經驗，以價格，可靠性，用戶的選擇計，引入競爭係一個漫長、複雜及循序漸進的過程；有競爭，電費未必較低，可靠性，安全或環保表現未必較佳，但用戶可有多啲選擇。（按：如果係為咗有選擇而選擇，對用戶根本無甚益處，環境局自己嘅資料說明此點。）
（五）是否在2018年前有新電源？（甲）香港人對從內地電網輸入電力有保留，（乙）不大可能會有具規模的新本地供電者，（丙）分體式發電有可能，但規模小。
（六）加強聯網：（甲）基於電費的差異將會收窄，邊際發電成本接近，及大量投資，用戶在短期內不會得益，（乙）長遠在加強與內地電網連接以引入競爭時考慮……其他唔講嘞，就以上述幾點而言，環境局其實承認咗香港九龍現行之發電供電安排，已達世界最高標準，無可批評地方，即使引入甚麼競爭及發電聯網，其實對降低電費毫無幫助，現在嘅香港電費已便宜過紐約、倫敦、雪梨、新加坡呢啲大城市！