眼中釘雷神同潘頓仲停緊賽，十三屆冠軍騎師韋達，點會甘於只贏第四場「華美之寶」咁單調？砌到第九場佢卒之起孖。呢場三班千六米，韋達續策葉廐「天才」，被捧成2.7倍一面倒大熱，就算座騎早段居後，難以穩定走勢，直路初又重重圍困，最終都畀佢抽出望空衝刺，用番同主「英才」日前贏馬韋達條外叠私家路，越衝越勁之下逢馬過馬，有驚無險地為此駒打開在港勝利之門。
四月份跑咗五次賽事，韋達直到呢場為止，四次起孖加一次大四喜，今個月已經贏咗12場頭馬，家陣揸住61win，穩守騎師榜三哥位置。而葉楚航以「夢仙」勝出氹仔馬場澳港盃後，由澳門客場贏到返香港主場。
韋達至今策梁麟炳名下的「英才」加「天才」合共騎咗六次，總成績三冠兩季一殿，冇甩過獎金。今場算係熱門天下，「天才」大熱贏，第三熱「索咖啡」後上入Q，次熱「尊兄」跑第三，第四名「紅駿」12倍至叫做冷啲，不過四重彩都派六千六百幾。