政改方案周 三出爐後，成個問責班子（特首梁振英應該除外！）最快周六落區幫手宣傳袋住先，而領軍落區梗係好打得嘅政務司司長林鄭月娥！上陣前先熱定身，大戰倒數一星期，林鄭噚日早午近黃昏，先後港九新界連趕三場，由跑步到青少年再到踢波嘅活動統統現影蹤，而佢忙碌之餘仲要換衫轉look，賣力演出爭民望，相信都係唔想政改甩轆。
爭取年輕人支
林鄭先喺一朝早深入迷霧中嘅山頂，以「關懷愛滋」贊助人身份出席全港首個以對抗愛滋病為主題嘅慈善跑步賽；長袖衫tee外笠住大會提供嘅白色tee，林鄭以衣着表明同其他跑手站在同一陣線。到咗中午佢就換番藍白色西裝褸外套配藍色長褲，去到新界區嘅沙田馬場出席馬會撥款5億推動嘅「青年生涯規劃」項目；年輕人係政府爭取支持嘅對象，試問林鄭又點可以唔支持呢個為青少年提供升學及就業支援嘅計劃？
咪以為林鄭之後有得唞，佢大概4點已經趕去九龍區嘅樂善道石鼓壟道遊樂場，出席無家者世界盃活動，而呢個時候佢亦着上大會提供嘅白tee，同現場人士揮手兼握手，冧到唔少市民笑咁口。連趕三場都冇遇狙擊，輕鬆過關，相信為林鄭周六帶隊落區打咗支強心針咯。
李八方
mailto:[email protected]