周日下午，嗒番杯，人生一大樂事。呢排天氣有時潮濕，有時又熱，搞到又攰又冇胃口，最啱飲梅酒，好開胃醒神。梅酒不妨自己浸，灣仔街市生果檔同費清講，有唔少客嚟買青梅浸酒，每磅12蚊，價錢同上年差唔多。
自家浸酒，100個人有100種做法。費清就請教浸梅酒專家Jacky Yu，佢話好簡單，青梅、冰糖同米酒嘅份量係1:1:1，如果唔想咁甜，冰糖份量可以少番啲。首先洗乾淨啲梅，再等佢自然吹乾表面水份，用竹籤挑走蒂頭，喺梅身拮一、兩個細窿，之後將梅同冰糖一齊放入玻璃樽內，再倒入米酒密封就搞掂。浸3個月就飲得㗎啦，不過最好係浸足一年，等啲梅味有時間出晒嚟。
至於酒呢，Jacky話可以用國貨，雙蒸同三蒸浸梅酒，味道係最正，但國貨就要揀大牌子先買，原因點解大家心照。如果唔想用中國米酒，咁大家係有自由意志嘅，例如揀伏特加同威士忌，Jacky就試過用威士忌浸梅酒，仲話極之香醇。費清就飲過浸3年嘅梅酒，梅味芬香馥郁到不得了，飲完真係精神一振。
青梅最當造係清明前後，𠵱家仲可以買到，賣多一兩個禮拜㗎咋，要浸趁早，否則買唔到就要明年請早。
費清 ＃要生計，也要生活 ＃毋忘初衷