大台今晚播秋官大時代，丁蟹效應又嚟料，連財爺都話丁蟹效應可以提醒小股民留意股市風險。你信嗎？不理你信不信，反正我相信了。港股上星期累升380點，相比對上星期累升近二千點，升勢步伐減慢，內心都會問：「唔知仲會升到幾時。」與其心大心細，不如認清市況最實際。上星期五連串消息來襲，中證監公佈規管融資融券業務外，歐美股市都腳震。道指上周五跌過350點，幾乎蒸發年內升幅。大家聚焦儲局會否提早加息，加上希債危機未搞掂，大市回調警報響起。
回顧港股大升市，香港為中國資本走出去打開大門。但係借股市升勢創造財富效應推動經濟，非預期咁容易。按照西方學說，股市向好，有助經濟增長；企業擴大投資，股市大升亦可創造財富效應；股民有錢賺，使錢多咗去推動消費。不過今次係非典型升市，衍生投機，並非投資。牛市之後，通常輸錢比贏錢的人更多。今個月初CNN報道一個調查話，中、港、日、美、法同加拿大嘅散戶，每月炒得最多係中國散戶，佔咗八成人。其次係香港散戶，佔比七成幾。日本同美國散戶只喺佔五成左右，法國同加拿大嘅散戶最懶。但炒得多唔代表贏得多，得3%嘅中國散戶話做到目標收益，美國散戶就有兩成人做到。中國散戶係炒得落力，最弊佢哋入市好似賭大細，又經常高追，連同出出入入嘅手續使費，難怪潮退時多數冇褲着。
C+B
本欄逢周一刊出