認字特警最近似乎喺北區出沒。近日有人同八方報料，話民建聯北區區議員柯倩儀，有幅宣傳盆菜宴嘅橫額，將辦事處寫成「辨事處」，而民主黨北區區議員羅世恩，又有張宣傳旅行團嘅單張，將「和諧號」寫成「和詣號」。
柯倩儀反應好快呀，八方一搵佢，佢就好似知道同寫錯字事件有關咁，仲話助理都發現到錯字，會盡快改正，好彩印錯字嘅橫額唔多，得兩幅咁大把，仲多謝八方提點㖭，唔通有當區居民已經同佢反映過意見？羅世恩亦好有觸覺喎，佢話見到個「詣」字，即時問過助理㗎，助理就話呢個字旅行社嗰邊都有用，而佢都係會盡快向旅行社嗰邊確認。
可能年尾就係區選，所以大家特別留意區議員嘅一舉一動，相信各位區議員嚟緊都要更謹慎，否則又會被認字特警逮捕㗎。