今期（19日）第八場三班泥地1200米，「怡昌之星」同「京城珍寶」又再碰頭，呢對馬上月下旬喺同程較量，結果「怡昌之星」喺潘頓胯下輕勝，「京城珍寶」跑入亞軍，估計呢對馬今次仍會受到重視。但佢哋唔係冇缺點，「怡昌之星」上次係久休復出，今次冇咗新鮮感，再跑1200米會嫌短，排12檔亦係隱憂。而「京城珍寶」無疑季內六戰三冠三亞進步神速，但加分多體力消耗亦大，上場初上三班，雖入Q但全無威脅，提防已係強弩之末。
咁今場邊隻馬值得博冷呢？「勁感」其實都諗得過，近三場兩度喺二班上名，無論喺短途1200米面對惡馬「豪逸」、「追風駿足」，抑或喺一哩火併已加到92分嘅「喜喜寶」，都同樣只輸一馬位，今次「勁感」降入三班明顯贏級數，表面泥地冇乜根據，但原來季初曾喺泥地一哩後上第五，距離頭馬泥地不敗怪獸「準備就緒」只兩身位左右。
仲有一點大家要留意，就係「勁感」馬主兼馬會副主席周永健呢排好旺，冇耐前賣出金鐘一個寫字樓單位，持貨22年賬面約賺9,200萬，如果「勁感」能勝出，對周永健嚟講，無疑係好戲在後頭，錦上添花。