【扮靚籽：時裝熱榜】
No.1 Nikelab × Johanna F. Schneider又潮又實用
令一眾潮女們盲搶的Nikelab x Sacai被掃空後，話口未完Nikelab又有新搞作，今次與柏林運動服設計師Johanna F. Schneider第二次合作，推出春夏實用性與潮味並重運動服。
搶眼度爆燈的手繪塗鴉款leggings，與記者們一致力搶的橙紅風褸，無論真正落場做運動，或當時裝配搭都無得輸，真想跟Nikelab說一聲：「放過我個銀包啦！」
No.2 是時候重投501牛懷抱
Levi’s在我眼中已不單只是一條牛仔褲，而是一種態度。不過近幾年遺棄直腳褲的我，令家中條501已經隱藏櫃底多年，最近看見全新501 CT系列，似乎我又可以回歸501懷抱了。501經歷了11次改版，CT系列將經典的直筒褲型改為窄腳褲型，貼腳效果roll起褲腳後更有型，而Precita的洗水及磨爛效果更是我的最佳心水。Levi’s以Live in Levi’s為主題，邀請了全球十多位來自不同界別的音樂人拍攝CT系列宣傳片，帶出音樂與時裝不開分割的訊息，這種型格態度也是叫Levi’s迷追隨多年。
No.3 公主系少女大愛 粉紅輕紗泡泡裙
倫敦時裝新秀Molly Goddard的設計一向出名夢幻又高貴，就連歐美著名Fashion blogger Susie Lau都大愛！本年度春夏系列最吸睛定必是吹波糖粉紅色泡泡裙，使用輕紗布料使剪裁飄逸，穿上身少女味濃之餘極夢幻，十足十迪士尼系列中的睡公主歐若拉的現代版。而時裝展當日，嘉賓名模周汶錡亦以型格cyber girl look出場，全白連身裙配上銀色短靴既簡潔又有型，簡直是春夏配搭示範作！
No.4 Steve Madden × Iggy Azalea 潮着Hip Hop女神鞋
近年最火紅的女Rapper除Nicki Minaj之外，定必是美國女歌手Iggy Azalea，配合Iggy邁亞密女孩的熱情澎湃，打造出90年代風格的粗跟厚底鞋，及運動型格的橡膠涼鞋。大膽顏色對比勁具個性，不過最重要當然是鞋型着得雙腿極修長，穿上後零秒變Hip Hop女神。
No.5 可摺式水Boots迎雨季
眼見各大時裝品牌都跟風出水boots，便知現代女生的鞋櫃總有一代水Boots旁身。雨季埋身，也是時候尋找獵物，Aigle的摺疊式橡膠靴Rubberpack一直是我的頭號目標。今個夏天Aigle以Rainpack雨具套裝推出Transway連帽防水斗篷及Miss Marion可摺式水Boots系列，看見咖啡色Miss Marion，實在流晒口水，易襯之餘又不怕黑沉沉。可摺設計既輕便又不阻位置，買對長放在車中，也不怕遇上失雲雨。
No.6 母親節甜心首飾sweet爆
5月10日就到母親節，媽媽大晒，當然要預早準備搜羅禮物。Thomas Sabo剛剛推出“Open Your Heart”母親節系列，以925純銀製成的心型獎章雕刻了蔓藤花紋圖，代表媽媽的大心心內藏代表了子女的迷你心心吊墜，sweet到呢。有個低調媽媽的，也可選條「月女之光」手鏈 ，夠晒elegant。
No.7 Daniel Wellington另一選擇
簡約復古風的手錶品牌Daniel Wellington，被一群學生妹及至OL吹捧上天。本身我都覺得DW幾靚又易襯衫，但就係唔想人覺得我盲目跟風。向大家推介由兩位倫敦年輕設計師創立的品牌Olivia Burton，既有DW風格相似的復古簡約系列（好多朋友仲以為我戴咗DW），亦有英國玫瑰等系列，更多選擇，而且size較DW細小，適合骨架細小的我。更重要係，價錢平好多！！！
No.8 韓風 × Sacai外套
之前阿徐率先著咗Nike × Sacai聯乘設計嘅波浪尾風褸，我妒忌到幾晚都瞓唔著。嘩！一開售淨係件褸都幾千蚊，著一季就過時，買唔過。咁啱喺網店見到呢件外套，心裏面笑咗出嚟！外套同樣有波浪尾，入面襯sport bra加tight pants，一樣型格，好彩唔係抄足，抄足我都唔會買，幾舊水買嚟過吓癮！
No.9 碎花少女布鞋
夏天又到，本年春夏大吹運動風，除配襯波鞋外亦可買一對快靚正布鞋，作為夏季潮鞋櫃內的必備item。看厭了純色布鞋，Superga新推出的碎花布鞋亦非常易襯，配夏日運動風短裙仔清爽之餘，完美演繹鄰家女孩可愛感。
No.10 環保連身裙 有拜拜肉都唔怕
一向喜歡有領衫，就算夏天都總係覺得著件小恤衫襯裙襯短褲都會Cool啲！一早有留意玩環保系衫領頸鍊二合一起家的本地設計師Kenny，最近他的Full collection登陸Novelty Lane，最愛那條ruffle娃娃連身裙，夏天一件過唔使諗襯衫，啡色ruffle袖夠遮肉臂，小灰藍領又中我呢期detail pick！俾小小時間我掙扎下……
(a) Nikelab（銅鑼灣白沙道7號地下）
(b) Levi's（尖沙咀The One L116號舖）
(c) I.T.（金鐘金鐘道88號太古廣場252號舖）
(d) Steve Madden（中環國際金融中心1036舖）
(e) Aigle（中環國際金融中心商場2期2013號舖）
(f) Thomas Sabo（銅鑼灣時代廣場524舖）
(g) Olivia Burton（ http://www.oliviaburton.com/）
(h) Cue Fashion（ http://www.cuefashiononline.com）
(i) Superga（尖沙咀海港城港威商場2樓2607號舖）
(j) Novelty Lane（香港灣仔莊士敦道104-106號2樓）
攝影：黃子偉