有位老友睇完上星期日（四月十二日）蘋果日報A6版全版講「城市論壇」35周年專題報導，打電話俾左丁山：「喂，蘋果講城市論壇四代主持吳明林、韋基舜、毛孟靜、謝志峰，我睇埋上文下理，推算到吳明林係開山祖師，1980做到1982，韋基舜由82做到92，跟住係毛孟靜，然後係謝志峰由2003做到今年十月底退休為止，咁毛孟靜咪做咗主持12年？我記得冇咁耐噃？係唔係仲有其他一位呀？你話呢？哈哈哈！蘋果又有一幅相片，係2003年沙士期間，嘉賓戴上口罩，但嗰位主持冇戴，你認唔認得佢係邊位呀？哈哈哈！」
老友幾幽默，明知故問。依家啲記者編輯大概夠晒年輕，不知歷史，又唔去求證，港台公關大概又唔提供充份資料，求求其其就算，於是老友口中所講嘅毛孟靜就似乎做咗12年主持，實情當然唔係，因為毛小姐做到1996就不知為何冇做落去，前廣播處長張敏儀親自打電話搵一位姓香的去頂檔，於是姓香的就坐上「城市論壇」做主持，好似頭尾做咗六年半左右。其實張敏儀在91年已經搵姓香的去做主持，不過姓香的那時候去咗星島做集團總經理（中文報業），唔想分身兼俾人誤會，故此冇答應，直至到1996年姓香的已辭去明報執行董事一職，回復自由身，張敏儀再搵佢，先至走入維多利亞公園中央涼亭。其實35年來，「城市論壇」主持唔止五位嘅，仲有其他人士做過一啲短時期，知得最詳細嘅應該係吳明林，依家啲年輕記者、公關可能只識一半半，不及其餘。
「城市論壇」有幾多收視率？相信唔會好高，畢竟星期日中午十二時至一時係好多香港人全家嘅中午出外飲茶時間，留在家裏睇電視嘅人會有幾多吖？但係好奇，做過「城市論壇」主持好易俾人記得，尤其是係的士司機，姓香的離開論壇多年，好多時坐的士仍會俾司機問：「你咪係城市論壇主持？」喂，已經冇做成十二三年咯喎，仲講？老友在電話中問及：「點解姓香的做咗六年就唔繼續？」原因好簡單啫，97之後，馬會將星期六賽事削減至最低，以星期日賽事為主，姓香的往往要趕住入馬場，覺得甚為不便，到後來咪索性唔做囉。有一位維園阿伯亦是馬迷，有一次姓香的在論壇完畢後請佢坐埋的士一齊衝入沙田馬場㖭！