等咗六年，女力士返嚟喇！香港田徑系列賽噚日喺將軍澳運動場上演第三回合，前港將胡泳彤重返訓練場半年，就兩度刷新自己保持嘅香港紀錄，最終以48米58封后，成為下禮拜三25歲生日最佳禮物。
曾經係女拔田徑猛將嘅胡泳彤，升上港大後就因傷放棄標槍，轉攻羽毛球。不過，呢位女力士始終唔捨得「成名作」，上年大學畢業後又練番標槍。噚日喺第二擲，佢造出47米78，第五擲再擲出48米58，打破自己保持六年嘅47米22香港紀錄。
呢位女力士現職保險業，但嚟緊都想擺多啲時間訓練：「之前我定咗25歲前破紀錄嘅目標，估唔到可以夢想成真。老實講我曾經諗過唔再練田徑，但教練鄧根來幫我試新技術，效果唔錯。今次成績達到世大運要求，希望為港出賽，甚至出戰下屆亞運。」至於百米男飛人就由李律言以10秒80奪得，欖球女將潘栢茵就以12秒37喺女子100米封后。上月尾打破男子400米港績嘅陳嘉駿就跑出47秒67，今日轉戰另一強項400米跨欄。