上個禮拜曼城曼聯大戰，好在小弟都冇點到大家，「入球大」上半場已經穩袋，更估唔到嘅係大手交收，艾舒利楊格同爆炸頭（右二）更加係屈機局，紅魔朋友由開場嚇一跳輸一粒，再睇住逐粒還擊再完勝，霸氣出番晒嚟，執筆時仍未知昨晚車曼大戰如何，要落注真係十級難，不如上波網睇軌獌友打牙骹好過。
呢兩個禮拜又點可以唔提歐聯？爆冷局有拜仁作客慘負波圖，之前上網仲見到有巴打話拜仁作客贏有1.65倍，非常抵食，話馬會益街坊云云，紛紛話重槌執金，結果當然中伏。波盤股市一樣，切忌跟大圍，網上明燈處處，自己睇路，過兩日次回合拜仁仲有冇咁惡可以絕地反擊晉級，此乃戲碼，主場博入球「大」好正路。另外，首回合艦隊皇馬果然又食唔到馬體會，之後亦係硬仗一場，感覺上有少少伏，齋睇算。
講開波，近嚟講波界最hit嘅除咗足球，一定係佢：潘源良。呢位講波佬今年六月搞個人歌詞作品展，紅館吹大雞，多年來填詞作品唱紅唔少巨星，個個都畀面落場唱歌，又林子祥葉蒨文、達明關淑怡，坊間估仲有林憶蓮王菲陳奕迅張學友陳慧嫻，成支銀河艦隊齊晒章，香港盛事也。
小弟多口，直情要求潘sir喺紅館大台講幾分鐘波，又或者足球戰報咁，皆因歷史上紅館冇人做過，話晒真係一個「體育館」嚟㗎。
梁栢堅
填詞人+彩池人