網上見到原籍喀麥隆嘅基藍馬終於等到本特區護照好開心，因為有機會代表香港踢國際賽，好多人唔明白，點解家陣入籍嘅球員歸屬感隨時多過土生土長嘅一代，我都冇答案，戥佢開心之餘心諗，做香港人有咁興奮咩？
上一代就話香港人勤力、醒目、轉數快！今時今日勤力就無謂多講嘞，因為入面牽涉到逼學生死讀書嘅學制，以及勁剝削打工仔嘅工時，講起都嬲又點會覺得自豪吖！
至於醒目同轉數快呢，細細個睇《掌門人》玩嘉賓又覺得幾搞笑嘅，但係大個接觸多咗外國朋友，成日聽到佢哋對香港人嘅評價，原來係練精學懶同唔衰得。咁會唔會喺待人接物度攞番啲分呢又？
但根據旅遊業行家話，旅行食buffet時若果國內朋友未出現的話，最嘈嘅肯定係香港人；如果食緊嘢有人投訴，而投訴嘅苦主唔係美國人的話，好大機會又係香港人。
有外國返嚟香港嘅朋友，佢打開電視睇咗一日，結論係香港人煮嘢食應該係世界第一，個個節目都係煮煮煮同食食食；然後佢行咗一日街，發現行人避喼嘅腳法非常靈活，有啲中國功夫feel！
認真講我細個不嬲以為香港人最叻嘅係賭術，可能係因為睇得賭乜賭物電影多，又可能係因為香港馬會無處不在，亦可能係因為親戚朋友聚會唔食飯都會打麻雀，所以以為香港人個個都係賭神，點不知前排睇見有個國際麻雀大賽，冠軍係日本人喎，咁又冇埋呢項「國技」嘞，咁仲有咩威水呢香港人？
外國朋友忍唔住搭嘴：香港人叻講嘢囉！
我問：「真心？」
佢：「吹水吖嘛，好勁㗎你哋！」
為免畀位佢再訕笑，我轉話題：「訂咗Apple Watch未？」
「訂咗啦，我想用嚟計吓每日行咗嘅路，當做運動！不過我點計都唔夠香港人行得咁快呀！」
噢，香港人，原來都有樣嘢叻，或者有日喺市中心行路都會有比賽，我有少少信心會行得快過基藍馬。
KEYMAN
節目主持