早幾日世界盃外圍賽抽籤，香港抽到同中國、卡塔爾、不丹同馬爾代夫同組；同前港隊教頭平哥講起出線形勢，我話凡事總要有希望，但星級管理大象即刻反問我係唔係儍咗。我話今日香港隊其實都唔差，如果高麗金選多一兩個入籍兵補充吓三線，唔會冇得踢。平哥就話：「領隊，大象講得啱㗎，唔好儍啦，唔好話中國呢關難闖，西亞卡塔爾甚至馬爾代夫都唔易打。呢幾十年大家一直都只係記住『五一九』，同『豬仔』神救12碼將中國踢出局，仲有冇成績，大家心照啦。」
教頭甄都話香港班細路真係激死，諗同講就個個都叻，可惜冇一個捱得苦；佢跟住指住日本仔，就話：「人哋三張幾，𠵱家仲日操夜操，叫班𡃁仔學一半都好囉。」我望住日本仔，佢即刻笑吓，跟住仲細細聲話，呢個禮拜日乙有場磐田山葉對東京綠茵，可以諗要主W。佢話磐田開季可算十分順利，皆因季前準備得好，引援有道，除咗前英格蘭國腳保夫萊特之外，巴西「大嚿佬」艾達頓杜斯山度士更加有料到，踢七場有18次射門，入咗五球。相反綠茵持續近年頹勢，今場主勝熱透，唔會錯！
另外，下周一場西甲艾爾切對皇家蘇斯達要客W。莫耶斯接手皇蘇幾個月，成績算唔差，隊中助攻最多嘅皮亞圖上場對拉科仲有入波，英式踢法配西班牙技術有啲化學作用，經常兩三腳掟入禁區，一個窩利就搞掂！
本地職業領隊
耳聽八方 專收好料