聯合醫院有假醫生出沒，喺醫院做過醫生嘅公民黨立法會議員嘅郭家麒就話，自己都有留意單新聞，話其實要扮醫生真係唔難，只要搵件白袍、入面着件鬆身藍色保護衣、着對波鞋、戴個聽筒，人人都可以即時on call 36小時，加上醫院有好多閒雜人等，保安人員有時都唔敢刁難啲醫生出入，即使話冇帶證都唔敢問長問短，而實習醫生每三個月轉一次崗位，所以有護士誤會佢係醫生同佢食消夜都唔出奇。郭又話讀醫嗰個年代就有個醫科生畢唔到業，接受唔到現實，成日喺醫院行嚟行去，佢又話畢唔到業前景好慘，因為冇牌冇得做，退而求其次讀其他科目又接受唔到。