立法會開始審議財政預算案，長毛佢哋班激進派泛民一開波就拉布，八方以為財爺曾俊華應該幾憂心，不過鬍鬚曾似乎已習慣拉布呢種「新常態」，唔單只冇乜影響佢心情，仲應社企邀請，聽日去一個別開生面嘅暗中作樂演唱會，試試喺伸手不見五指黑暗中聽歌。
「暗中作樂」演唱會究竟係乜？相信唔少人都去過位於美孚嘅社會企業、黑暗中對話（Dialogue in the Dark）體驗館，嘗試沒有半點光嘅世界，明白失明人士嘅世界究竟係點，而暗中作樂演唱會就喺佢哋搞，觀眾只係可以用隻耳仔欣賞，冇得睇。
傳林憶蓮演出
負責邀請財爺出席呢場暗中作樂演唱會嘅「對話體驗」董事局成員黃英琦（Ada）同八方講，因為財爺喺預算案支持創意工業以及社企，加上今次活動係為黑暗中對話作大型籌款，所以邀請財爺出席。曾經睇過容祖兒、林二汶喺暗中作樂演唱會嘅Ada話，喺黑暗中聽演唱會感覺相當特別，一來可以感受失明人士嘅世界係點，二來現場會有嗅覺體驗，換句話說，觀眾喺一個多小時嘅表演中，只可以用耳仔同鼻去欣賞，而入場帶位嘅人士都係失明人士，令活動推動社會共融嘅氣氛。
八方仲知，呢場暗中作樂演唱會嘅演出嘉賓，除咗有倫永亮外，仲有神秘天后坐鎮，但主辦單位大賣關子唔肯講，八方聽聞係林憶蓮，難怪門票要1,500蚊一張飛。
李八方
mailto:[email protected]