今晚英超迷應該越夜越興奮，拙攔重心亦放喺「尾場」，曼聯同阿仙奴身上，博兩「紅」雙喜。
英足盃準決賽阿仙奴鬥英冠雷丁喺今晚深夜12點20分開波，相隔10分鐘後，大約車程距離溫布萊僅40分鐘嘅史丹福橋球場，會鳴笛上演英超前列大戰， 一哥車仔迎聯賽六連勝嘅紅魔。英足盃被睇小唔係呢一、兩年嘅事，但英超有關方面出到頂爛市呢招，就真係小家啲；站在值博率睇，車仔喺聯賽嘅絕對優勢，或令曼聯有機可乘，強勢球隊成冷門，優先點評。
摩佬謹慎唔求全勝
從近態、現時人腳同歷史往績，筆者對車仔能全勝餘下賽事，捧走聯賽冠軍一直抱極大懷疑。接連兩個禮拜，鬥今季餘下最強對手曼聯及下周作客阿仙奴，唔繼續攻擊佢哋，冇乜機會咯。車仔上周臨完場前險勝昆士柏，已非偶然，屬近三戰淨勝中下游隊一粒收工嘅例牌戰果；摩佬一向謹慎，吃回頭草翌季不容再失錦標，但呢兩場唔輸，其實可以接受，戰術上會繼續保守。
翻查近10季英超冠軍平均有88.2分，而對上10季最高分冠軍，正係04-05年，初由摩佬接手嘅車仔，即以紀錄性95分並拋離阿仙奴12分登頂；車仔𠵱家積73分，就算全勝到餘下七戰都破唔到當年嘅紀錄，何況今戰箭頭又會焗用37歲嘅杜奧巴，對比當年嘅勇態同陣容，估計今季去到近10季平均分封王已屬佳績，即起碼有六至七分嘅失分空間。客軍曼聯執靚個陣後，棄將全變勇將，今場係爭標最後機會，決心極大；不用理會近七戰對賽不勝車仔，今場鬥搶中場，曼聯勢不落下風，博高水下盤或[+1]之餘，冷客W亦可，助己如助「兵」。
今晚英足盃牌面一面倒，上季有晒鬥次級隊陷苦戰經驗嘅阿仙奴，預料90分鐘可解決雷丁入決賽，再有時間留意比賽中嘅另一紅軍曼聯，會唔會令車仔失分。不過英足盃每見下風隊打高一、兩皮波下，試取兵工廠贏3:1、3:2呢類大比數波膽，放貼士框。阿仙奴畀番冇咁穩嘅施捷斯尼守龍，熱門客可以取1.5倍入球「大」；串射曼聯下盤外，周日曼城主場勢炒踢風流波嘅韋斯咸止瀉。
波神
神級攻略 智破足彩