喺政商界叱咤一時，回歸前晉身為首位英國華人貴族嘅鄧蓮如勳爵（Lydia），將結束喺老牌英資洋行太古長達19年嘅非常務董事職務，下月底太古舉行股東大會，佢會辭任董事及退休，至此卸下所有本港上市公司董事職務。
去年露面風采依然
現年75歲嘅鄧蓮如，70年代末至90年代初活躍香港政壇，曾任行政及立法兩局首席非官守議員。不過1996年初她退下火線，與丈夫唐明治（前律政司）告別香港，長居英國。喺商界長袖善舞嘅Lydia，自1981年起擔任太古常務董事，96年至今轉任非常董。90年佢亦獲匯控委任為獨立非執董，92年兼任集團副主席，至08年才退休。舊年5月太古股東會，鄧蓮如在港露面，身形依然fit到漏油，風采依然，更獲大股東施懷雅家族太子爺施銘倫親自招呼。太古公佈亦指大酒店董事總經理兼行政總裁郭敬文股東會結束後，退任獨立非常董職務。