特區政府下個星期三（22日）就會推政改方案，政改大戰一觸即發。特區政府準備好似上次2010年嗰次「起錨」咁，叫齊三司十二局一齊落區，聽講特區政府仲度咗個新口號㖭。今次政改中，初頭政府用「有商有量，實現普選」做口號，到前排第二輪政改諮詢時，政府就用「2017機不可失」。呢次嚟到戲肉，當然有新口號，但知情者雖然三緘其口，不過一問到會唔會好簡單，譬如一個字「掂」呢？知情者立即話「近磅喇」。
今次落區有部份場合就安排傳媒採訪，部份就靜雞雞進行，費事被圍攻，至於下周六個啟動禮嘅地點，知情者一啲風聲都唔漏，以免被人狙擊。