昨日講阿爺大力唱好股市，新華社、人民日報不斷發表文章推動股市向上，繼而默許北水大舉南下炒港股，故此有經紀話阿爺派錢，唔攞就笨，但去攞都要夠膽識至得，好似388咁，以市值計已經係大牛龜，居全球交易所股第一位，居然可以一日升10%實在匪夷所思，若非內地熱錢來港炒起佢，點都冇人信，總之夠膽就跟風，冇膽就得個睇字。
阿爺如此大舉行動，必有所圖。中國經濟其實唔多好，今年第一季宣佈嘅GDP增長7%六年來最低，貿易數字遠不如理想，但係點解股市進入大牛市呢？理論上，股市係經濟實體表現之反映，股市睇未來，故往往走在經濟前頭幾個月至半年。但現實中國經濟情況與股市有嚴重脫節，橫睇掂睇，中國經濟幾個月之後都唔會進入大牛市。故此咯喎，中國官媒大合唱，令內地分析師歌頌「信任黨的智慧和力量」，股市必然向好，內有玄機，玄機就係以繁榮牛市掩飾經濟下行風險，希望憑大量市場流動性（market liquidily，由寬鬆貨幣政策而來）推高股市，創造財富效應，刺激消費，實行以「股市拉動經濟實體」嘅倒果為因嘅做法，順帶讓北水南下，炒旺香港，令梁振英有面子，適時地抵銷一簽多行嘅衝擊（對零售業而言）。
炒旺股市除了可以「安內」，亦可以「攘外」，堵塞國際學者宣揚「中國崩潰論」，例如美國權威中國專家沈大偉之文章"The Coming Chinese Crackup"（三月六日華爾街日報），又如四月十日彭博網站專稿〈令人驚恐的中國經濟〉。中國今年的最大外交成就及突破，就係擊退美國之外交圍堵，順利創立亞洲基礎設施投資銀行（AIIB），拉攏到英國及歐盟國家加入AIIB，令美國及日本非常尷尬。中國承諾注資AIIB五百億美元，佔股權50%，故此AIIB係一個可勝不可敗嘅龐大項目，如中國有成功金融中心及興旺股市為後盾，將AIIB總部放在北京，就更有說服力，故此左丁山大膽猜測，直至AIIB正式成立之日，中國官媒歡呼「AIIB成功開辦」之時，中港股市仍有向上動力，不至突然間crackup，令沈大偉David Shambaugh之輩嘅預言兌現。