好多時啲人都會話政客好識做戲，八方相信好極都唔夠勞工及福利局副局長蕭偉強，事關蕭偉強真係做過戲，而且係喺香港話劇團度做演員㖭。蕭偉強同八方講，1978年佢港大畢業嗰陣，一心就諗住打政府工，貪其人工好嘛。除咗申請做行政主任，玩開戲劇嘅佢，亦考慮過喺麵包同理想之間攞個平衡，於是申請入港台做助理編導，點知過到筆試，就過唔到負責面試佢、後來做咗廣播處長嘅張敏儀嗰關。
於是蕭偉強就膽粗粗，考咗入去香港話劇團做演員，喺《灰闌記》入面飾演所羅門王嘅侍衞。佢話當年人工係每齣劇800蚊，唔算多，所以當政府收佢做行政主任，每月有成2,000蚊左右，佢就即刻入咗政府，從此了結咗佢嘅演藝事業。