大牌子潮興走過界，同其他品牌大搞crossover，最新有「超跑」林寶堅尼。林寶宣佈同行李箱品牌TecknoMonster合作，推出以跑車做概念嘅行李篋。暫時未知「林寶篋」碌得快唔快，但價錢已先聲奪人，4個篋款最貴要8.8萬元。
呢款叫Bynomio系列嘅行李篋，設計靈感嚟自超級跑車，用料同跑車差唔多，包括超高壓成形嘅碳纖維、鋁合金等；篋面縫上林寶嘅六角形logo，而且係意大利生產。
「林寶篋」嚟緊會喺公司官網發售，最平一個5.5萬元，仲貴過LV最經典嘅Monogram軟皮拉篋（約3萬元）。但買呢類奢侈品，價錢應該唔係買家嘅考慮因素喇！