陳慧珊（Flora）的老公兼經理人鍾家鴻(Mike)於2012年2月入稟高院自行申請破產，聲稱身為市場推廣公司老闆嘅佢公司運作不大順利及遇上糾紛，佢本人唔想糾纏落去，故與律師研究後決定申請破產，當中不涉及妻子，對家人生活亦不會構成影響。Mike係咁話，但依家家中重擔落晒喺陳慧珊身上，除要密密接job搵銀外，更要湊女買餸做阿四。
去年拍完大台劇《女人俱樂部》，是非頻傳又話同劇中眾女角不和、不滿扮奸角戲份又較少云云。雖然否認傳聞，但的確之後嘅宣傳活動，陳慧珊十居其九都冇到。
老公破產期成四年，仲有兩年要捱。但陳慧珊又好似唔憂生活咁，之前明明接拍大台劇《衝上雲霄2》，埋門一腳忽然話要重返校園辭演，之後都有拍劇，包括內地劇《港媳嫁到》，仲係做配角，跟住又停工半年，係最近先至又幫大台拍劇，更被傳擺款發老脾掟劇本要PA執添，好似真係唔憂做咁。
曾表明經濟冇問題嘅陳慧珊，昨日又做咗周刊故事主角。報道話，陳慧因為要孭起頭家，故於老公破產初期，舉家由月租五萬嘅薄扶林冠冕臺搬到同區舊樓，租金平一半㗎，點知最近，佢哋再搬入壽臣山麒麟閣豪宅，每個月要成八萬蚊租，老公仲揸咗架今年二月先至落地、成47萬嘅新Benz嚟探老婆班。
鍾家鴻破產令未完，呢架新Benz登記車主亦唔係佢，而係陳慧珊任一人董事嘅TALENT HUES MANAGEMENT LIMITED登記。該公司名下仲有三架車，一架係98年以30萬買入嘅寶馬，一架係01年以41萬買入嘅銀色Benz，同埋呢架落地兩個月嘅Benz。
該周刊幫陳慧珊計過條數，話家陣佢搬咗新屋之後，加埋生活費、學費同買車錢，單單係今年頭呢四個月，已經使咗成110萬，租金都用咗32萬。佢哋又幫計過條數，話陳慧珊由2013至2015年只係拍過三套劇，包括《女人俱樂部》、《港媳嫁到》同大台新劇，去內地拍劇當佢片酬收100萬，幫大台拍就40萬一部，夾埋都係180萬左右。冇理由180萬片酬可以頂到咁龐大嘅日常支出，究竟陳慧珊財來何方？