香港電影金像獎絕對是影壇盛事，能夠選影后似乎也只是影人的事。不過，今天的香港是人人話事的時代，《蘋果》娛樂版結合專業影評人、導演、娛圈中人以及觀眾，齊齊選心水影后，最後專業界別、街坊觀眾均選阿Sa跑出，而娛圈中人則以吳君如與阿Sa叮噹馬頭，看來全民直選還是本土大勝。
【專業之選】
黃國兆（影評人及導演） 心水影后：蔡卓妍
「我想趙薇贏亦都投咗佢一票，但覺得阿Sa會贏，始終阿Sa套戲多人睇，自然迴響大，亦都影響評判投票。」
彭浩翔（導演） 心水影后：周迅
「我梗係揀周迅，唔係因為套戲係我拍，當唔係我拍都揀佢，好鍾意周迅拍喜劇，佢演繹唔識詐嬌嗰吓真係好傳神。」
郭子健（導演） 心水影后：趙薇
「唔使問一定係趙薇，淨係喺公安局認仔同女嗰幕已經夠贏，完全掌握到農民嗰種無知同空洞嘅眼神。如果今年有飛躍進步獎阿Sa就一定攞。」
張居（影評人） 心水影后：吳君如
「最佳女主角不是進步獎，《雛妓》阿Sa有突破，但演技始終未夠級數。吳君如和周迅贏面較高，前者鋒芒畢露，勝在有霸氣，後者看似漫不經心，其實暗裏出招，非常高章。」
敬璜（影評人） 心水影后：蔡卓妍
「阿Sa豁出去演三級片，裸露兼爆粗，令人眼前一亮，看她就如看到影壇的新希望，容易打動評審。另外四位乃爭獎常客，看慣看熟，阿Sa勝在夠新鮮，爆冷絕非空想。」
【影人之選】
張智霖 心水影后：蔡卓妍
「蔡卓妍《雛妓》佢好嘢呀，破格演出，好犀利，我投佢一票。」
雷頌德 心水影后：蔡卓妍
「女主角就揀蔡卓妍，好多人同我講佢做得好好，套戲又有話題性，個角色好突破，係出力之作。」
魯芬 心水影后：吳君如
「最佳女主角我揀吳君如，阿Sa仲後生大把機會，要耐啲時日先。」
王菀之 心水影后：吳君如
「我心想梗係君如，因為佢係我恩師、伯樂，同佢真係演得好好。」
劉心悠 心水影后：趙薇
「影后一定揀趙薇，佢掌握得個角色好細膩，證明佢好入戲。」
周柏豪 心水影后：吳君如
「君如嘅演出好能夠帶出香港情懷，係我哋香港人嘅電影。」
楊淇 心水影后：吳君如
「我心目中係君如姐，部戲上時我都有睇，我好鍾意呢部戲，好表達到香港情懷同埋年代變化，《親愛的》有睇，但《雛妓》我未睇。」
周家怡 心水影后：趙薇
「聽過趙薇演講點去做呢部戲，已經好欣賞佢。以往都有睇趙薇嘅演出，好鍾意佢演繹，真係演員。」
黃美棋 心水影后：蔡卓妍
「我會揀阿Sa，因為呢套戲佢好突破，打破咁多年框框，大家覺得佢好cute，好得意，呢一套做出嚟，畀人睇到好唔同一面。」
吳千語 心水影后：蔡卓妍
「阿Sa係香港女演員而且有突破會揀番佢。」
【街坊之選】
陳小姐 心水影后：吳君如
「君如就真係好好笑。」
Joe 心水影后：蔡卓妍
「我知應該係阿Sa！」
陳小姐 心水影后：蔡卓妍
「阿Sa喺《雛妓》嘅表現好突破。」
李先生 心水影后：吳君如
「吳君如好笑又好戲。」
關小姐 心水影后：蔡卓妍
「阿Sa演得算唔錯，估佢唔到。」
