【本報訊】「我只希望可以湊仔同做返兼職，甩咗嘅頭髮可以留返長。」留長頭髮對愛美女子原是平常不過的事，但對因血癌藥脫髮的親姐來說，一把長髮卻是遙不可及的夢。她面對的煩惱遠不止三千煩惱絲，因她與丈夫及5歲兒子一家三口，要為每月萬多元血癌藥費憂心，莫說家中電器要親友送贈，連傢俬亦是靠二手捐助，他們更連床也沒有。現時一家三口每晚只睡在同一張地席上，但他們一家仍樂觀堅持，而丈夫及兒子亦省吃儉用，只為親姐這位好妻子好媽媽儲錢買抗癌藥。 記者：馮詩媚
曾擁一把長髮及腰，加上化妝，親姐頗有姿色，她翻看前年補拍的婚紗相時不禁慨嘆：「好鍾意自己長頭髮，好睇之餘，紮起又方便。」可是，在便利店工作的她，不知為何年前常感疲憊不堪，且面色蒼白：「有一排成日暈，仲以為自己貧血，8月病發，用手掂下頭髮都會『一執執』甩出嚟，有日差啲暈低，之後去醫院檢查，到睇報告，醫生就話叫晒啲屋企人嚟，當時就覺大鑊，點知真係有Cancer。」
被驗出患上血癌，最初親姐獲公立醫院提供化療資助針藥，可惜三個月後便不敵藥力肝功能受損，繼而細菌入血送院急救。留醫深切治療部個多月，她形容當時日子生不如死：「見住好多人走(離世)，佢哋嘅屋企人都喊得好淒涼，成日諗如果到自己，情況都會係咁，屋企人一定好難過。」
出院後，丈夫為了照顧她和5歲兒子暫棄全職工作：「老公趁我精神好啲，會返替工司機，每日做成十幾個鐘，每個月都只係得萬幾蚊，啱啱夠我食藥。所以屋企啲電器，係屋企人夾錢送，傢俬都係社福機構攞嘅二手嘢，冇床瞓最多腰酸背痛，冇所謂，經濟好啲先買。」即使如此，她也樂觀撐下去：「諗得太多仲快死。」
積極面對癌魔，她最終遇到一線生機：「醫生話只要有適合嘅骨髓就有得醫，不過唔知要等幾耐，畀錢私家醫院做又要幾十萬。好彩兩個月前，醫生話我細佬骨髓適合移植畀我，嗰刻真係好開心，好過中六合彩，唔駛再無了期咁大海撈針，總算有個希望。」
上月瑪麗醫院致電給她有床位做移植手術，但卻發現親姐卵巢有懷疑水泡及有蛀牙，擔心手術後細菌感染，換骨髓的機會就這樣擦身而過。現在她積極作好準備，等待下次換骨髓。但親姐在等候床位期間，仍需每月付近14000元的針藥費控制癌細胞，她盼善長能捐助所需藥費，解決一家的經濟困難讓她看到康復的曙光：「好返之後，想留返長頭髮，同以前一樣，返兼職、湊仔！」
「蘋果日報慈善基金」得知「親姐」的情況後，協助籌募善款支付藥費，盼「親姐」可戰勝癌魔，延續生命！
「親姐」捐款編號：C3891
網上捐款： http://bit.ly/1nQRthE